Баш бит | Минең профиль | Регистрация | Сығыу | Инеү | RSS | Шәмбе, 27.04.2024, 04:17 |
Башҡорт теле һәм әҙәбиәте | |
Һеҙ Гость булып керҙегеҙ "Ҡунаҡтар" төркөмө Һаумыһығыҙ, ҡунаҡ! |
|
Баязит БикбайБаязит Ғаяз улы Бикбаев (Баязит Бикбай) 1909 йылдың 19 ғинуарында Башҡортостандың Күмертау районы Ҡалта ауылыңда тыуған. Уның атаһы күп йылдар ауылда уҡытыусы була. Баязит Бикбай тыуған ауылында ике йыл уҡығандан һуң Ташлы профессиональ-техник мәктәбенә уҡырға инә. 1923 йылда Ырымбурҙағы Башҡорт педагогия техникумына урынлашып, бында 1928 йылға тиклем уҡый, ә унан һуң Өфөләге педтехникумға күсә һәм уны 1929 йылда тамамлап сыға. Бынан һуң ул төрлө газета һәм журнал редакцияларында эшләй. 1930—1931 йылдарҙа (Р. Ниғмәти, Б. Дим менән бергә) Туймазы районының «Ленин юлы» газетаһының яуаплы секретары, 1931 —1935 йылдарҙа «Башҡортостан» газетаһында бүлек мөдире, «Октябрь» журналының яуаплы секретары, Башҡорт академия драма театрының әҙәбиәт бүлеге мөдире вазифаларын үтәй. Баязит Бикбай бик йәшләй художестволы әҫәрҙәр менән мауыға, 9—10 йәштәрендә ул Ғ. Туҡайҙың байтаҡ шиғырҙарын яттан белә, башҡорт, татар халыҡ ижадын яратып уҡый. 1927 йылдарҙа өлкә газета һәм журналдарҙа шиғырҙары күренә башлай. Тәүге китабы 1932 йылда баҫыла. Баязит Бикбай башҡорт әҙәбиәтенә индустриялаштырыу һәм ауыл хужалығын коллективлаштырыу йылдарында килә. Шиғыр һәм поэмаларында шул осорҙоң һулышы һиҙелеп тора. Ижадының үҫә һәм камиллаша барыуы 1929—1930 йылдарҙа яҙылған «Үтеп барған көндәр» поэмаһында асыҡ сағыла. Баязит Бикбайҙың утыҙынсы йылдарҙағы уңышын «Ер» поэмаһы билдәләй. Улай ғына ла түгел, был әҫәр бөтә башҡорт әҙәбиәтенең ҙур ҡаҙанышы булды. «Поэма халыҡтың Октябрь революцияһына тиклемге ауыр тормошон һүрәтләүҙе «Башҡортостан тәне ҡара янған меңәрләгән ҡамсы эҙенән» тигән образлы юлдар менән башлап, һәм әҫәр Совет Конституцияһын ҡабул итеү, бәхетле тормошҡа дан йырлау менән тамамлана. Әҫәрҙә халыҡтың героик тормошон күрһәтеүҙә шағир башҡорт халыҡ ижады өлгөләрен уңышлы файҙалана. Уның һәр шиғыры, ул лирик пландамы йәки эпик характерҙамы, ғәҙәттә, сюжетҡа ҡоролған була. Тыныслыҡ, демократия һом социализм өсөн көрәш темаһы — Б. Бикбайҙың утыҙынсы йылдар поэзияһында ҙур урын ала. Бөйөк Ватан һуғышы йылдарында Б. Бикбай поэзияһы тағы ла үҫә һәм активлаша. Ул был осорҙа Яҙыусылар союзында етәкселек итеү менән бергә поэзия, проза, драматургия жанрҙарында байтаҡ әҫәрҙәр ижад итә. Уның әҫәрҙәрендә патриотизм, Ватанды һаҡлау, тылдағы героик хеҙмәткә дан йырлау, дошманға нәфрәт темалары өҫтөнлөк итте. Оптимизм, социалистик гуманизм, Коммунистар партияһына ҙур ышаныс, илде һөйөү һәм еңеүгә ныҡлы ышаныс, халыҡтар дуҫлығы, интернационализм кеүек совет кешеләренә хас уй-тойғоларҙы шағир уңышлы сағылдыра. «Утлы юлдар», «Беҙҙең ҡала», «Ҡулъяулыҡ» йыйынтыҡтарына ингән күпселек шиғырҙарында совет халҡының бына шундай изге уй-тойғоларын, гүзәл характерҙарын һүрәтләне, уларҙың батырлығына, ҡыйыулығына дан йырланы. Был йәһәттән яҙыусының реаль тормош факттарын сағылдырған «Самолет алған Хәбирьян» тигән очергы айырыуса әһәмиәтле. Ошо осорҙа яҙылған «Ватан саҡыра», «Бер ата балалары» кеүек пьесаларында ла Б. Бикбай совет кешеләрен патриотизм рухта тәрбиәләү маҡсаты менән эш итте. 1937 йылдан алып Баязит Бикбай драматургия жанрында актив эшләне. 1938 йылда Башҡорт академия драма театрында уның «Ҡарлуғас» музыкаль драмаһы ҡуйыла. Яҙыусы беҙҙең әҙәбиәтебеҙгә легендар Салауаттың художестволы образын тыуҙырыуға ҙур көс һалды. Ул 1938—1939 йылдарҙа шағир Ғ. Сәләм менән бергәләп «Салауат» драмаһын яҙҙы. 1951—1952 йылдарҙа халыҡ тарафынан йылы ҡаршыланған героик драматик поэмаһын ижад итте. Ошо драматик поэма нигеҙендә яҙылған либреттоһына башҡорт композиторы 3. Исмәғилен музыка яҙҙы. «Салауат Юлаев» операһы тамашасыларҙың яратҡан әҫәренә әүерелде. Башҡорт дәүләт опера һәм балет театрының милли репертуарын байыҡтырыуҙа ла Б. Бикбайҙың хеҙмәте ифрат ҙур. Ул «Азат» операһы (Р. Мортазин музыкаһы). «Ҡоҙаса» тигән музыкаль комедия һәм «Шәүрә» тигән трагедиялар либреттоһын (3. Исмәғилен музыкаһы) яҙҙы. Яҙыусының «Ҡаһым түрә», «Ватан саҡыра», «Бер туғандар», «Аҡҡош йыры» драмалары башҡорт әҙәбиәте үҫешенә ҙур өлөш булды. Баязит Бикбайҙың «Ҡояшлы көн» повесы нигеҙендә яҙылған «Аҡселән ташҡанда» романы, «Аҡсәскә», «Тере шишмәләр» тигән повесы һәм башҡа әҫәрҙәре китап уҡыусылар араһында популяр булды. Уның поэзияһы, драматургияһы кеүек үк, прозаһы ла үҙенең бай һәм образлы теле менән уҡыусының иғтибарын тарта. Б. Бикбай М. Бубенновтың «Аҡ ҡайын», М. Горькийҙың «Минең университеттарым», И. Тургеневтың «Тыуыр көн алдынан» әҫәрҙәрен башҡорт теленә тәржемә итте. Әҙәбиәт өлкәһендәге ошо хеҙмәттәре өсөн ул «Почет Билдәһе», «Хеҙмәт Ҡыҙыл Байраҡ» ордендары менән наградланды һәм уға Башҡортостандың атҡаҙанған сәнғәт эшмәкәре тигән почетлы исем бирелде. 1970 йылда, үҙе үлгәндән һуң, уға Салауат Юлаев исемендәге премия бирелде. 1934 йылдан СССР Яҙыусылар союзы ағзаһы ине.
|
|
Ағиҙел 2012 |
Бесплатный хостинг uCoz |